lundi 4 février 2013

Pichòt collègi devendrà grand…





Lo 23 de genièr de 2013, lo Conselh General d’Erau confirmèt per la boca de son vice-president Pèire MAUREL, cargat de l'Educacion, que lo collègi Leon Còrdas fariá plan sa dintrada del 3 de setembre de 2013 dins de novèls locals.
Es una data istorica de marcar d’una crotz occitana sus los calendièrs vòstres.

A dich de perseverança e de diplomacia, avèm capitat totes amassa, a assegurar l’avenidor de l’ensenhament occitan dins la continuitat e lo desvolopament. Va bolegar!

Daissarèm nòstres locals actuals devenguts tròp pichòts per nòstres collegians, lors ensenhaires e la quinzena de sòcis del personal non ensenhaire per de l’espaci!

Implantat sus un terren de mai de 5000 m², nòstres novèls locals de 2000 m² permetràn d'aculhir a tèrme 200 collegians e d'i crear lo primièr licèu Calandreta.
Aqueste bastiment banhat de lum es sufisentament vast per ofrir condicions d'acuèlh e d'ensenhament optimalas :
-        Uèch salas de cors entre 43 m² e 70 m²,
-        Salas dedicadas als ensenhaments scientifics, la musica, a las arts plasticas e a l’espòrt,
-        Un CDI implantat a la calma de planpé.

Costat internat, dròllas e dròlles auràn cadun lor estatge, dispausant de sanitaris  confortables e se poiràn pausar dins un fogal bèl  dotat d’una sala vidèo.

L'ensemble s'articula a l’entorn d’'un pati central e es implantat al sen d’un pargue ornat d'esséncias mediterranèas.

Totes amassa, avèm de pan sus la planca per preparar aquesta mudança e adaptar a aqueste novèl environament, los nòstres metòdes e projèctes, per capitar aquesta dintrada 2013 E...


...pichòt collègi devendrà grand !


Aucun commentaire:

Enregistrer un commentaire